జననమొక సక్సెస్ జన్మనిచ్చినవాళ్ళకి
మరణమొక ఫెయిల్యూర్ నమ్ముకున్నవాళ్ళకి
నడుమ బ్రతుకున లెక్కలన్నీ నా ఒక్కడివేనా??
ఎన్ని పొందానో
ఎంత పోగొట్టుకున్నానో
పద్దు రాసుకుంటూ పోతే
హద్దులు ఎరుగుదునా??
గెలుపునో, ఓటమినో
సొంతం చేసుకోవడానికి
నాకు నచ్చిన ఆటని
నన్నెక్కడ ఆడనిచ్చారసలు??
బలవంతపు ఆరంభాలు
అయిష్టపూర్వక ముగింపులేగా అన్నీ??
పదిసార్లు పడిలేస్తే కానీ
నడక రాలేదు....
పన్నులూడగొట్టుకుంటే కానీ కాళ్ళకి
పరుగు రాలేదు...
మోకాళ్ళు,మోచిప్పలు పగలకొట్టుకుంటే కానీ
సైకిలు రాలేదు....
పోగొట్టుకుంటే కానీ
జాగ్రత్త తెలియలేదు...
కోల్పోతే కానీ
పొందడం తెలియలేదు...
అప్పులైతే కానీ
పొదుపు తెలియలేదు...
గాయమైతే కానీ
నొప్పి తెలియలేదు...
భారాన్ని మోస్తే కానీ
బాధ్యత తెలియలేదు...
ఏదైనా నేర్చుకునే ముందో
కొత్తగా తెలుసుకునే ముందో
ఏదో ఒకటి నష్టపోవడం జరిగితేనే
అది ఓటమి అంటే.....
ఏదైనా పోగొట్టుకున్న తరువాతో
ఎంతో కొంత నష్టపోయిన తరువాతో
ఏదో ఒకటి లాభం రావడం జరిగితేనే
అది గెలుపు అనుకుంటే....
నా గెలుపులన్నీ లాభం లేనివే..
నా ఓటములన్నీ నష్టం లేనివే....
ఎందుకంటే,
పోగొట్టుకున్నాక పొందినది గెలుపు కాదు
పొందాక పోగొట్టుకున్నది ఓటమీ కాదు
నా దృష్టిలో ఎప్పటికీ....!!
