నేనొక అసంపూర్ణంగా మిగిలిపోయిన వాక్యాన్ని..!!
పూర్తి చేస్తావో...పూర్తిగా తుడిచేస్తావో నీ ఇష్టం..!!
నేనొక అస్పష్టంగా వ్యక్తబరచబడ్డ భావాన్ని..
అర్ధాన్ని అద్దుతావో...నీ అసహ్యాన్ని రుద్దుతావో నీ ఇష్టం...
నేనొక అయోమయంతో అడుగులేస్తూ అర్ధాంతరంగా ఆగిపోయిన పాదాన్ని..
నమ్మకాన్నిచ్చి నడిపిస్తావో...నడి సంద్రంలో వదిలేస్తావో నీ ఇష్టం...
నిన్ను పొందలేని నిస్సహాయత నిండిన బలహీనతని..
జతై నన్ను బలపరుస్తావో.. దూరమై మరింత బలహీనపరుస్తావో నీ ఇష్టం..
ప్రపంచానికి దూరంగా విసిరివేయబడ్డ భారాన్ని...
నీక్కూడా బరువనుకుంటావో.. నేను నీ బాధ్యతనుకుంటావో నీ ఇష్టం..
సమాజం దృష్టిలో నేనొక నిత్యం జరిగే పొరపాటుని..
ప్రేమగా సరిదిద్దుతావో... తప్పునయ్యేదాకా ఎదురుచూస్తావో నీ ఇష్టం...
అస్పష్టమైన ముగింపుని...
అర్ధంలేని తెగింపుని
అర్ధరహిత భావాల మధింపుని
నెరవేరని ఆశల కుదింపుని...
కొత్త బ్రతుకునిస్తావో... ఇలాగే బ్రతకనిస్తావో
నీ ఇష్టం.... అంతా నీ ఇష్టం...!!
-శతఘ్ని....!!
No comments:
Post a Comment